Македонија
25. March 2016 - 12:30

Донирана опрема за Интензивниот оддел на Детската клиника

Комплети за нормално дишење на новороденчињата, вакум аспиратор, сонда за пулсиксометар и апарат за фототерапија кај бебињата доби денеска Интензивниот оддел на Универзитетската клиника за детски болести.

Станува збор за последна донација во рамки на кампањата „Шанса за живот“ на компанијата „Окта“.

- Две години поминаа, а навистина направивме една таква акција и ја подигнавме општествената одговорност. Како директор на Клиника и како раководител на Одделот за интензивна нега и терапија ја почувствувавме потребата од дополнителната опрема со која на сите дечиња ќе им се даде шанса да бидат среќни покрај своите родители извадени од овие тешки ситуации, истакна директорот на Клиниката, Аспазија Софијанова и се заблагодари за донацијата.

Оваа кампања, посочи, ни даде можност да сфатиме колку сме силни како лекари, колку навистина нашата хумана работа дава нов живот, а шансите што ги дадовме благодарение на сето ова заедно уште повеќе не мотивира, знаејќи дека понекогаш сепак работите зависат од добрата волја и од нашето знаење.  

- Ние тоа го споивме - нашето знаење и волјата на оваа компанија заедно со оние кои го организираа сето ова, додаде Софијанова.

Главниот извршен директор на „Окта“, Јанис Геруланос рече сакале да придонесат таму каде помошта била најпотребна.

- „Шанса за живот“ беше иницирана со цел да се подобрат условите во Одделот за интензивна нега на Клиниката за детски болести. Убедени сме дека иницијативата што решивме да ја преземеме навистина направи разлика. Добивме голема поддршка од граѓаните, компаниите и други организации, потенцира Геруланос и заблагодари на сите кои учествуваа и донираа во рамки на кампањата.