Донесен законот за неработна недела за трговците во Федерацијата Босна и Херцеговина

Домот на народите на Парламентот на Федерацијата Босна и Херцеговина (ФБиХ) денеска го усвои Законот за внатрешна трговија со кој се воведува неработна недела во продавниците. Со оглед на тоа што истиот закон претходно беше усвоен од Претставничкиот дом на Парламентот на ФБиХ, тој ќе стапи на сила осум дена по објавувањето во „Службен весник на ФБиХ“.

Во согласност со тој закон, работодавачите се обврзани да ги усогласат работата и деловното работење, а законот вклучува и амандман на Владата на ФБиХ со кој се овозможува локалните заедници да бидат изземени од примената на членовите од законот во посебни ситуации.
Законот ја дефинира забраната за работа на дуќаните и пазарите во недела, а можат да работат цвеќарници, пекари, сувенирници со предмети од стари и традиционални занаети.

Забраната за работа во недела не се однесува на продажните објекти кои се наоѓаат внатре или се составен дел на железнички и автобуски станици, аеродроми, хотели, области на културни и верски објекти, музеи и природни паркови…

Неработната недела не важи за аптеките кои работат 24 часа.

За законот гласаа 55 делегати, тројца беа воздржани, а еден беше против.