Детско франкофонско катче во библиотеката во Неготино

Градската библиотека „Страшо Пинџур" во Неготино денеска го промовираше Детското франкофонско катче.

Директорката Катерина Данаилова информира дека е ова прво катче од ваков вид во Македонија, проект на библиотеката кој се реализира со поддршка од Општина Неготино, Францускиот институт - Скопје и непрофитната организација „Библионеф" од Франција.

- Катчето има 150 најсовремени книги на француски јазик. Опфаќа најнови изданија на сликовници, енциклопедии и други едукативни книги од современато француско книго издаваштво. Градоначалникот Ванчо Апостолов го поддржа овој проект кој претставува  и решавање на проблемот што го имаа најмалите деца кои го изучуваат францускиот јазик, за дополнителна литература и надополнување на образовниот процес, соопшти Данаилова.

Франкофонското катче, додаде, е уште еден чекор на приближување на библиотеката кон малите читатели и искачување едно скалило погоре во смисла на осовременување, квалитет и воведување на нови иновативни услуги во библиотеката.