Безмалку половина од граѓаните бараат една изборна единица

Речиси половина од граѓаните сметаат дека постојниот изборен модел треба да се смени. Според последната анкета која за Детектор ја спроведе Институтот за политички истражувања Скопје, 48,4% од анкетираните сметаат дека наместо 6 треба да имаме една изборна единица. 32% од анкетираните велат дека изборниот модел треба да остане онаков каков што е во моментов, односно пропорционален со 6 изборни единици. 19,6% од граѓаните немаат одговор на ова прашање.
Според анкетата, најзаинтересирани за овие промени се граѓаните на возраст меѓу 40 и 49 години. Според анкетата 52,5% од нив мислат дека е потребна промена на изборниот модел. Според образованата структура на анкетираните, најзаинтересирани за промени се оние со високо образование. Дури 56,4% од нив сметаат дека е потреба промена на изборниот модел во една изборна единица.
Анализата на резултатите според етничката припадност на анкетираните покажува дека и Македонците и етничките Албанци сметаат дека е потребна промена. За една изборна единица како подобар изборен модел се определиле 46,7% етнички Македонци и 52% етнички Албанци.
Анкетата на Институтот за политички истражувања Скопје е спроведена по нарачка на Детектор во периодот од 4 до 7 октомври врз репрезентативен примерок од 1106 испитаници.