Авионот кој се урна во Катманду погрешно слетувал

Авионот кој при слетување се урна во Катманду и приоѓал на пистата од погрешен правец, изјави генералниот менаџер на аеродромот во главниот град на Непал, Рај Кумар Четри.

Снимката од разговорот меѓу пилотот и контролата за воздушен сообраќај покажала дека постоела конфузија за тоа од кој правец авионот би требало да слета.

Според менаџерот на аеродромот, пилотот на авионот ни ги следел инструкциите за слетување, кои му ги давала контролната кула и авионот „не бил во линија со пистата како што требало да биде“.

Тој додаде дека од контролната кула неколку пати прашале дали пилотот е добро и оти секој пат одговорот бил „да“.

Авион на компанијата „ЈуЕс-Бангла Ерлајнс“ вчера при слетување во Катманду излета од пистата и се запали. Во леталото имало 67 патници и четворица членови на екипажот, од кои загинале најмалку 50 луѓе.

Според други медиуми, загинале најмалку 38 луѓе, а 23 се повредени.