Aнгеловски: Најлесно е да се критикува

Селекторот на македонската фудбалска репрезентација, Игор Ангеловски во интервју за веб сајтот на ФФМ  се осврна на моменталната состојба во националниот тим и побара трпение од јавноста за подобри резултати:

-Сите ние кои работиме во фудбалот, работиме во интерес на тој фудбал. Мене ми е жал што сите не работиме во иста насока, а тоа е за доброто на македонскиот фудбал. Оваа репрезентација е на сите, ако победуваме заслугите нема да бидат само на селекторот и играчите, туку на сите кои го поддржуваат тимот. Најлесно е да се критикува и да се кршат ѕидови кои веќе се напукнати. Мојата комуникација со играчите е конструктивна и интензивна и тоа е убаво и така треба и да биде. Ме радуваат позитивната атмосфера, сплотеноста и нивниот однос кога се во националниот тим -  смета Ангеловски.

Првиот стратег на „рисовите“ најави и подмладување на селекцијата:

-Јасно ми е дека јавноста со нетрение очекува подобри резултати, но без разлика на поразите на последните натпревари, јас сум непоправлив оптимист и тоа што го имам зацртано и реалните можности ќе го спроведам до крај, убеден сум дека сето тоа ќе ни донесе подобри резултати. Во однос на играчите од младата репрезентација, јас отворено реков и по моето назначување дека нивното вклучување во најдобриот тим е една од основните цели. Тоа и го направив со повикот на пет фудбалери од таа селекција за дуелот против Либан. По нивниот квлаификациски дуел со Украина и за пријателските натпревари во јуни поголем дел од тие фудбалери ќе добијат повик во А селекцијата. Целта е да се оформи тим од максимум 25-ет играчи, еден спој на младост и искуство и тие да го носат товарот на квалификациските натпревари. Најважно е секогаш да размислуваме за колективот, а фудбалот е колективен спорт, не е тенис. Успехот на екипата сигурно зависи и од индивидуалниот квалитет, но тој нема да донесе толкав успех, колку што тоа може да го направи колективниот пристап во приказната.