11-годишно неподвижно дете напуштено од родителите

Единаесет годишникот во сериозна здравствена состојба бил напуштен од родителите и препуштен на лице кое не е во можност да му пружи соодветна грижа и нега, па со денови не примал лекови и пиел само по една чаша млеко во денот.

И покрај јавувањата во Центарот за социјални работи во Охрид, институциите не преземале ништо. Барале потпис од родителите кои го напуштиле болното дете за да можат да го згрижат. Дека ќе го спасат и сместат детето во мал групен дом соопштија денеска дури откако со пријава за случајот се јави охридската полиција. Полицијата најави дека за напуштањето на детето ќе следува пријава за неговата мајка.

На 21.07.2020 година, во СВР Охрид добиено е телефонско известување дека 39-годишната С.В. од Охрид, во својот дом на улицата „Питу Гули“, без никаква грижа, храна и надзор, го оставила својот 11-годишен син кој бил неподвижен. против с.в. ќе биде поднесена соодветна пријава, соопшти свр охрид.

По најавата за кривична одговорност за мајката на напуштеното дете, реагираше и Министерството за труд и социјална политика.

Стручните служби и меѓуопштинскиот Центар за социјална работа во Охрид постапуваат во врска со случајот на 11-годишното дете со церебрална парализа. За детето е обезбедена соодветна грижа и сместување во мал групен дом, соопшти Министерството.