Во Карпош ќе се засадат нови 5.000 дрвца

Во рамки на акцијата „Ден на дрвото - засади ја својата иднина“ општина Карпош во соработка со ЈП „Паркови и зеленило“ засади околу 600 нови дрвја во Влае 1 и 2, Карпош 1 и 4. Општина Карпош донираше и садници во дворот на приватното училиште „Јахја Кемал“, како и во дворот на поликлиниката „Букурешт“.

Градоначалникот Стевчо Јакимовски засади неколку садници во паркот „Македонија“ во населбата Тафталиџе 1. 

- Садиме неколку илјади дрвја во општина Карпош за водухот да биде почист, за летно време да имаме повеќе сенка и Карпош да биде позелен од тоа што е. Со садењето на целата територија на Македонија се подига свеста за екологијата, како и за почиста околина, рече Јакимовски.

Нагласи дека во општина Карпош веќе има засадено околу 1.500 дрвја, а сега се садат околу 3.500 нови дрвја. - Тоа значи дека Карпош оваа година ќе биде пошумен и збогатен со зеленило со уште 5.000 дрвја, прецизира Јакимовски.

Нагласи дека од денеска па се до 30 декември, општина Карпош ќе продолжи да сади и да ги оплеменува зелените површини со нови и млади садници. Предвидени се да се засадат дрвја од видот на чемпрес, јасен, туја, јавор и каталпа.