Преглед на вестите од светот

Бројот на повредени во земјотресот во Тајван се искачи на 1.038, а бројот на загинати се уште е девет, додека 42 работници во хотел се водат како исчезнати.  Во градот Хуалиен заврши спасувањето на луѓето кои останаа заробени во урнатините на зградите. Возниот сообраќај на линијата кон Хуалиен е повторно отворен.  Ова беше најсилниот земјотрес во Тајван во последните 25 години, со епицентар најблиску до источната област Хуалиен, додека зградите во главниот град Тајпеј се стресоа, но претрпеа минимална штета.

Во Појасот Газа остануваат функционални само 10 болници во услови на ескалација на тензиите, изјави шефот на Светската здравствена организација (СЗО). Во моментов, медицинската служба во Појасот Газа е парализирана, а само 10 од 36 болници сè уште можат да функционираат дури и делумно. СЗО ќе продолжи да ги поддржува тие болници да даваат услуги најдобро што можат. По смртта на седуммината работници на Светската централна кујна (WCK) за време на израелски воздушен напад во понеделникот вечерта, бродскиот конвој со 240 тони неиспорачана хуманитарна помош за цивилите во Појасот Газа е вратен на Кипар.

Рано утринава руски беспилотни летала нападнаа станбени згради во Харков, вториот по големина град во Украина, при што загинаа пет лица, вклучително и спасувачите кои пристигнаа на местото на настанот, соопштија официјални лица.

Градоначалникот на Харков, Ихор Терехов, објави дека четири лица загинале на местото на нападот, од кои тројца биле спасувачи кои загинале во новиот напад. Повредени се пет лица.

Регионалниот гувернер на Харков, Олех Синехубов, напиша на Телеграма дека градот бил нападнат во најмалку четири брана.

Харков е честа мета на напади на руски беспилотни летала и ракети.

Обединетите нации го прекинаа ноќното движење низ Газа на најмалку 48 часа за да ги проценат безбедносните прашања по убиствата. Светската програма за храна (WFP) продолжува со дневните операции, вклучувајќи и испраќање дневни конвои во северниот дел на Газа. Во Брисел се одржува дводневен состанок на шефовите на дипломатиите на земјите од НАТО, по повод 75-годишнината од алијансата. Министрите за надворешни работи на 32-те земји-членки на НАТО разгледуваат начини да и дадат помош на Украина на долгорочна основа. Генералниот секретар на Алијансата, Јенс Столтенберг вели дека е постигнат договор за потребата од зајакнување на улогата на Алијансата во поддршката на Украина, но дека конечната одлука се очекува на Самитот на НАТО во јули во Вашингтон.