Победници во двојки на Macedonian Open 2026 се Марковски и Србљак

Македонската комбинација Обрад Марковски и Горазд Србљак триумфираа во конкуренција на двојки на годинашното издание на Macedonian Open 2026, откако попладнево во финалето за 79 минути ги совладаа Никола Керемедчиев и Давид Симеонов од Бугарија со 2-0 во сетови (7-5, 6-4).

Во првиот сет Марковски-Србљак направија брејк во седмиот гем и поведоа со 4:3, но веќе во следниот гем тенисерите од Бугарија успеаја да израмнат на 4:4. Новиот брејк за македонската двојка во 11. гем им донесе водство од 6:5 во гемови, а сетот го завршија откако го освоија гемот на свој сервис за 7:5.

Во вториот сет повторно во седмиот гем имаше брејк за Марковски и Србљак за 4:3, а потоа и во деветтиот гем направија брејк и сетот го завршија со 6:3 во гемови.

Утре со почеток во 11:30 часот на централниот терен на ТК „Југ“ во Скопје се игра финалето во кое македонскиот тенисер Калин Ивановски за противник ќе го има Украинецот Владислав Орлов.

МИА