Њујоршката полиција застрела човек вооружен со касапски нож

Њујоршки полицајци гонеа маж кој претходно ги нападнал со касапски нож, во сообраќајниот метеж по улиците на Менхетн. Напаѓачот бил неутрализиран со 18 истрели, пренесува БТА.

Властите во Њујорк соопштуваат дека напаѓачот, по име Акрам Џудех, кој живеел во своето возило, изгубил самоконтрола откако некој на покривот му ставил чизма. Заменик началникот на њујоршката полиција, Џејмс О'Нил изјави дека Џудех извадил касапски нож и им се заканувал на полицајците од станицата „Пен стејшн" и кога тие се обиделе да го уапсат, пружал отпор и ранил еден од нив во пределот на лицето. Откако обидите за совладување со електричен пиштол биле неуспешни, полицајците посегнале по своето огнено оружје.

Напаѓачот е однесен в болница и е во критична состојба.