Димитриев: Ако нема избори на 24 април, нема ни техничка влада

Техничката влада на подолг временски рок е неодржливо решение, не само во поглед на квалитетот на нејзиниот легитимитет, кој што природно извира од граѓаните, туку и во поглед на спроведувањето на политиките. Ова е ставот на премиерот задолжен за спроведување на избори, Емил Димитриев кој попладнево го објави на својот фејсбук профил.

Актуелната техничка влада е со ограничени перформанси, што е сериозен хендикеп во поглед на спроведувањето на политиките, реформите и мерките значајни за државата и очекувани од граѓаните, нo и во поглед на извршувањето на нејзината основна функција за организирање на претстојните избори, имајќи го во предвид самиот факт што дел од актуелните министри кои доаѓаат од опозицијата имаат нарушени човечки и професионални односи со преостанатите, видливи и поинакви приоритети, но и тоа што позицијата евидентно ја користат за исполнување на партиски агенди и директиви, пишува Димитриев.

Тој исто така потенцира дека ваквата состојба во изминатиов период резултира и со поднесување на повеќе кривични пријави кои ги отежнаа околностите под кои функционира оваа Влада.

Затоа се потребни избори час поскоро, на кои ќе се добие полн легитимитет ползуван од граѓаните на Република Македонија. Техничката влада со вака нарушени перформанси не може да биде супститут на онаа избрана на фер и демократски избори и таа не е никако одржливо решение на подолг рок. 

Мандатот на оваа влада е за организирање на избори, ако нема избори во тој случај се доведува во прашање целисходноста од нејзиното функционирање и престанува потребата и основната функција на оваа влада и треба да се врати политичката влада која беше со полн легитимитет избрана од граѓаните, пишува Димитриев, во исчекување на конечната одлука на Собранието, дали изборите ќе се одржат на 24 април или не.