Земан: Меркел згреши кога не постави лимит за примање бегалци

Чешкиот претседател Милош Земан денеска ги коментираше критиките на германската канцеларка Ангела Меркел во врска со миграциската криза, јави дописникот на МИА од Прага.

- Ангела Меркел направи две грешки. Првата беше кога Германија ги покани сите Сиријци и наеднаш што се случи? Сега секој е од Сирија, рече Земан.

Тој додаде дека сите бегалци имаат лажни сириски пасоши или немаат воопшто никакви.

- Тие се од Авганистан, Пакистан, дури и од Сенегал. Меѓу другото и од Албанија и Косово, што е интересно, рече Земан, според кого втората грешка на Меркел е што не се постави лимит за примање бегалци.

Чешкиот претседател е постојан противник на миграцијата и предупреди дека доколку продолжи бегалската криза, нема да дојде до нова светска војна, но ќе почне уништување на европскиот културен, социјален и политички систем.