ЗЕЛС бара посериозен пристап од МВР и МОН за секојдневните дојави за бомби

ЗЕЛС побара од МВР да преземе сериозни чекори за пронаоѓање на испраќачите на лажни дојави за бомби во скопските училишта. Претседателот на ЗЕЛС и градоначалник на општина Кисела Вода, Орце Ѓоргиевски вели дека родителите повеќе не се должни и не можат да го издржат овој притисок, кој, како што вели, е плод на неможноста на МВР да стави крај на оваа ерозија на системот.

Побара и МОН да најде начин за продолжување на наставата, бидејќи вчера онлајн платформата не функционираше.

-Како претседател на ЗЕЛС го повикувам министерот Спасовски да ги заврши објаснувањата како не можат да ги најдат сторителите, бидејќи во системот и МВР и тој е поставен за министер токму да ги најде сторителите. Не поминува повеќе никакво објаснување бидејќи резултати од ниедна истрага нема, напиша Ѓоргиевски на Фејсбук.