Зеленски: Вашингтон останува посветен на постигнување мировен договор

Претседателот на Украина, Володимир Зеленски, изјави дека САД сè уште се посветени на постигнување мировен договор, откако беше информиран за разговорите што украинските преговарачи ги водеа со американската страна.

Како што објави парискиот весник „Ле Монд“ на својата веб-страница, Зеленски во своето редовно обраќање синоќа изјави дека добил детален извештај од секретарот на Советот за национална безбедност и одбрана Рустем Умеров и началникот на Генералштабот на украинските вооружени сили Андриј Хнатов, по нивните состаноци со американски претставници.

Зеленски рече дека се подготвуваат нацрти на договорот и дека за време на разговорите се разгледани одредени точки.

„Остануваме во постојан контакт со САД и сметаме на континуирана соработка“, рече претседателот на Украина.

Зеленски додаде дека Вашингтон сака конечен мировен договор, наведувајќи дека Украина целосно соработува и дека „тоа никогаш нема да биде пречка за мир“.

Сепак, нагласи тој, Русија мора да престане со „саботажа на дипломатијата“ и сериозно да го сфати завршувањето на војната.

Украинскиот претседател, исто така, повика на континуиран притисок врз Москва за прекин на агресијата, тврдејќи дека меѓународната заедница ги има „сите потребни инструменти“ за да го постигне ова.

МИА