Завршија обуките за користење на компостерските машини во Пробиштип

По поставување на двете компостерски единици, заврши и обуката на претставници на ресторани, хотели и институции кои ќе одлагаат органски отпад во нив, информира Марија Митева од Општина Пробиштип. Обуките се дел од  проектот „Биоотпад“во кој партнер е Универзитетот „Гоце Делчев“ (УГД)-Штип.

– Оваа обука беше реализирана во два дела. Теоретскиот дел е спроведен од професорката  Марија Хаџи Николова, екстерен експерт по работен пакет четири. Таа пред претставниците ги претстави основните цели на проектот, што претставува процесот на компостирање, зошто е добро да се компостира, пионерските чекори во процесот на рециклирање. Акцент беше ставен на главната цел,  а тоа е заштита на животната средина, вели Митева.

Таа додаде дека со помош на летоци и презентација јасно е  назначено кој органски отпад може и смее да се става во компостерката, а кој не смее и не може.

-Техничките лица за УГД и за Општина Пробиштип по работен пакет професорите Ѓорѓи Димов и Марјан Михајлов укажаа на важноста на овој пионерски проект во менувањето на навиките, давањето пример на градот, заедницата и воопшто на државата, бидејќи овој проект може да се рашири како една добра пракса низ цела Македонија, вели Митева.

Придобивките од проектов е што  органското ѓубриво  ќе може да се користи за јавните површини на општината, но  и промена на навиките на луѓето во справувањето и сепарацијата на отпадот. Проектот се реализира преку програмата „Балкан Медитеран“ и ќе трае до 31 мај 2020 година.