Затвореник починал во Кумановскиот затвор

Починат затвореник е пронајден во неделата наутро (24 ноември) во Кумановскиот затвор, соопшти Управата за извршување на санкции. Причините за смртта, како што наведуваат од таму, ќе бидат познати по добивањето на обдукцискиот извештај.

Околу 7 часот и 30 минути при редовна утринска проверка на бројната состојба на осудените лица дежурниот командир заедно со помлад надзорник, исто така припадник на затворската полиција, на првиот кат во затвореното одделение во собата каде престојувало осуденото лице Л.Б. во неговиот кревет во позиција како да спие го пронашле осуденото лице без знаци на живот, се посочува во соопштението од Управата за извршување на санкции.

Веднаш потоа била повикана итна медицинска помош која во затворот пристигнала во 8 часот и 15 минути, но лекарите не можеле да сторат ништо од причина што лицето веќе било починато, а констатирано е дека нема траги на насилство.

Од Управата потенцираат дека по прегледувањето на снимките од камерите во затвореното одделение, констатирано е дека во текот на ноќта никој не влегувал во собата на осуденото лице, односно дека таму не престојувале други осудени лица заедно со него.

– Во непосредна близина на неговата ќелија има соба за надзор на осудените лица и од страна на затворската полиција, како и од осудените лица од затвореното одделение не било забележано ништо невообичаено во текот на ноќта пред немилиот настан, се наведува во соопштението од Управата за извршување на санкции.