Засадени 32 садници пред КИЦ-Скопје

Скопскиот градоначалник Коце Трајановски денеска се вклучи во садењето 32 листопадни садници во паркот пред Културно-информативниот центар (КИЦ), како дел на есенската акција за садење 5.000 дрвца на територијата на Скопје. 

Во паркот се засадени 11 платани, 12 костени, шест фотинии и три златни хамаеципариса. Зелената површина во паркот пред КИЦ, каде се засадени дрвцата е со површина од 837 метри квадратни и е реконструирана од Град Скопје во мај годинава. Во паркот е поставена и главна хидрантска мрежа од 120 метри и систем за полевање со 20 прскалки.

Во рамките на есенската акција на Град Скопје, во општина Центар ќе бидат засадени вкупно 317 садници во дрворедите на булеварите, во парковите и во блоковското зеленило во општината. Дел од садниците се од наше произвоство од расадникот во Бутел, а дел се увозни.

Садниците во општина Центар ќе бидат засадени на булеварите „Кузман Јосифовски-Питу“, „Кочо Рацин“, „Илинден“, „Партизански одреди“, „Гоце Делчев“, „Димитрије Чуповски“, на улиците „Кирил и Методиј“ и „Самоилова“, како и на Кале, кај СУГС „Јосип Броз-Тито“, кај Музејот на ВМРО и во близина на Амбасадата на САД.