Вулин: Блокадите во Србија ќе завршат во следните месец дена

Блокадите во Србија ќе завршат на единствениот можен начин – институционално и уставно. Очекувам тоа да се случи во следните месец дена. Тоа го изјави вицепремиерот на Србија во техничкиот мандат Александар Вулин за Политика, јави дописникот на МИА од Белград.

„Во тој период од месец дена ќе се донесе одлука за тоа дали ќе има нова влада или избори…Според мен, треба да се формира нова влада. Имаме криза во општеството, но немаме политичка криза, бидејќи во парламентот има јасно мнозинство. Ако опозицијата во парламентот имаше аргументи, немаше да ни фрлаат чадни бомби“, рече Вулин во интервјуто.

На прашањето дали ќе биде дел од новата влада, тој рече дека верува дека тоа ќе биде влада на континуитет со владата на Милош Вучевиќ, кој „одлично си ја заврши работата“.

Говорејќи по враќањето од Москва, тој рече дека таму се „многу загрижени за Србија и за сето она што се случува во целиот српски свет“.

„Тие јасно гледаат шема и хибриден напад врз Србите каде и да живеат“.

На прашањето за нафтената индустрија на Србија (НИС), тој рече дека тоа ќе биде „решено со согласност на Руската Федерација“.