Вучиќ вечерва во Берлин се состанува со Гренел

Српскиот претседател Александар Вучиќ утре ќе учествува на 56-тата Минхенската конференција за безбедност, каде ќе има серија билатерални средби со официјални претставници од светот, претставници на меѓународните организации и компании, јави дописникот на МИА од Белград.

Вучиќ најави дека вечерва ќе се сретне со специјалниот претставник на претседателот на САД за разговорите меѓу Белград и Приштина, Ричард Гренел, со кој, како што кажа, ќе разговара и за можноста за постигнување на договор за воспоставување на железничка линија меѓу Белград и Приштина, додолку се договорат сите детали на таа иницијатива на Гренел.

Во пресрет на конференцијата во Минхен, Вучиќ оцени дека конфренцијата е од големо значење за Србија, бидејќи ќе може подобро да процени кои се „понатамошните чекори на Приштина, кои се чекорите на Германците, Американците и на сите други во меѓународната заедница“.

Соговорници на Вучиќ ќе бидат и в.д. помошникот државен секретар за европски и евроазиски прашања на САД, Филип Рикер, како и некои истакнати американски сенатори.

Исто така, претседателот на Србија ќе разговара со Дејвид Вадефул, шеф на работната група за Западен Балкан во германскиот Бундестаг, како и со советникот на германската канцеларка Ангела Меркел за надворешна политика и безбедност, Јана Хакер и со други политички претставници.

Српскиот претседател ќе учествува и на тркалезната маса за безбедност на Балканот „Координација, соработка, консолидација? Поттикнување на напредокот на земјите од Западен Балкан“.