Вучиќ најави состанок со Заев и Рама за царинските бариери

На маргините на Генералното собрание на ООН во Њујорк, српскиот претседател Александар Вучиќ денеска се сретна со премиерите на Северна Македонија и на Албанија, Зоран Заев и Еди Рама, најавувајќи дека тие доаѓаат во Србија во првата половина на октомври на состанок посветен на отстранување на царинските бариери, пренесуваат српските медиуми, јави дописникот на МИА од Белград.

Како што кажа, со нив ја иницирал идејата за понатамошно отстранување на различните бариери за водење бизнис на територијата на трите држави и слободниот проток на стоки, луѓе и услуги, односно создавање еден вид „мал шенген“.

– Овој договор би требало да биде конкретизиран на 9 и 10 октомври во Нови Сад, бидејќи мислам дека е важно што ја инициравме идејата за регионална соработка. Ние сакаме да се поврземе економски и со тоа да излеземе пред ЕУ и другите како заеднички блок, изјави Вучиќ.

Тој истакна дека тоа ќе биде првиот чекор и оти за Србија ќе биде важно да ја вклучи и Приштина во таквата соработка.