Во Велес се одржа 9.„Сладоледијада“

Во организација на Здружението на жени за мултикултурни активности „Креација 2009“ вчера во Велес се одржа 9. манифестација „Сладоледијада“.

 

Освен забавен манифестацијата има и натпреварувачки карактер со изработка на интересни креации комбинирани со сладолед. Годинава учествуваа осум жени од кои четири првпат.

 

Жири комисијата одлучи првата награда да и припадне на Грозданка Павлова која вторпат учествува на манифестацијата, а овојпат  со креацијата „Невеста“.Второто место го освои Стефанка Ќулумова која за првпат учествува  и трето место освои Сања Петрова, а која по вторпат учествува на манифестацијата. Сите за награда добија повеќе килограми сладолед од спонзорот, а првонаградената и патување.од ТА „Невадо“.

 

Рајна Стојанова, претседател на Здружението „Креација 2009“, вели дека целта на манифестацијата е да дојде до израз креативноста на учесничките. - Воедно едно од мотото е и соработката на невладиниот сектор со бизнис секторот. И затоа упатуваме повик и до останатите фирми за соработка со невладиниот сектор и на овој начин воедно и рекламирање на еден поинаков посебен начин преку оваа манифестација, изјави Стојанова.

 

Првонаградената Грозданка Павлова вели дека е задоволна од манифестацијата каде до израз доаѓа нивната креативност.

 

- Одлучив мојата креација  да биде „Невеста“ бидејќи невестата е само еден ден и е посебна.Ја земав куклата од мојата внука и ја облеков во фустан-смеса од бисквити и сникерс и сето тоа го украсив и дополнив со сладолед, а тоа им се допадна на жирито и на присутните, појаснува Павлова.