Во транзитниот центар во Гевгелија заврши вакцинирањето против ПОЛИО за 138 мигранти

Во привремениот транзитен центар Гевгелија попладнево заврши вакцинирањето против ПОЛИО со кое беа опфатени 138 мигранти кои се сместени во кампот,соопштија од епидемиолошката служба на регионалниот центар за Јавно здравје која покрај вакцинирањето направи и редовен увид на здравствената состојба.

- Вчера и денеска успеавме да ја извршиме вакцинацијата на сите мигранти кои се затекнати во гевгелискиот камп.Вакциниравме вкупно 134 мигранти, а вакцината не ја примија две деца поради возраст помала од два месеци и две жени поради бременост, посочија од епидемиолошката служба.

При извршениот увид епидемиолзите констатираа дека хигиената во ПТЦ Гевгелија е на задоволително ниво и редовно се одржува, дека се врши редовна дезинфекција на сите објекти и дека во кампот не се пријавени заразни заболувања.