Во Штип трибина по повод 25 години од создавањето на Уставот на Р.Македонија

На штипскиот Правен факултет денеска се одржа трибина по повод „25 години од создавањето на Уставот на Репубилика Македонија“. Универзитетскиот професор, Владо Поповски, кој учествуваше во создавањето на Уставот пред 25 години, оцени дека беше цврст кога се донесе, но е моделиран во делот со решението со Охридскиот рамковен договор, а претходно се направија измени и под притисок на Грција.

- Уставот е во примена 25 години и ни еден устав на Македонија било да се вика Народна Република Македонија, било да се вика Социјалистичка Република Македонија не траел толку долго. Уставот на Република Македонија не е пречка за било кој правец од општествениот живот, истакна Поповски.

Тој посочи дека во земјава лесно се декларира, но тешко се почитува и декларира.

Универзитетскиот професор по уставно право Светомир Шкариќ на денешната трибина забележа дека уставотворецот во 1991 година заборавил да го гарантира правото на граѓанинот на употреба на својот јазик пред суд и пред државните органи, што е стандард во секоја држава. Според Шкариќ, политичките лидери можат да бараат измени на Уставот, но телата, односно Собранието е тоа кое што треба да процени дали се потребни измени.

- Кај нас тие желби можат полсено да се оставруваат, бидејќи во Македонија никој не го следи остварувањето на Уставот во практиката. Ние сме ретка земја во Европа која не води грижа за својот Устав, нагласи Шкариќ.

Уставот е дело на народот и во него треба да учествуваат голем број на стручњаци од сите области, смета научната фела.

Во рамките на денешната трибина на Правниот факултет на Штипскиот универзитет беше промовирана и книгата „Создавање на независна Македонија: Внатрешни состојби и надворешна политика“ од професорите Дејан Маролов и Оливер Митев. Промотор на книгата беше професорот Страшко Стојановски од штипскиот Правен факултет.