Во Берово во тек аплицирањето за проекти за подобрување на социјалните услуги

Во Берово привршува рокот за поднесување проекти за подобрување на социјалните услуги. Како што информира Билјана Марковска од општина Берово, повикот е отворен до 15 октомври, а преку кој невладините организации и граѓански здруженија, аплицираат за грантови средства, што ќе се доделуваат за вршење социјални услуги на територијата на општина Берово.

-Јавниот повик е отворен како дел од таканаречениот „Проект за подобрување на социјалните услуги, преку изразување интерес за аплицирање за средства за грант и развој на социјални услуги”. Преку овој инклузивен процес, сакаме да се информираме за идеите и предлозите на граѓанскиот сектор, во сферата на обезбедување социјални услуги на локално ниво, со цел да се пружи подобра заштита и нега на граѓаните на Берово, истакна Марковска.

За таа цел, ги повикува сите заинтересирани страни (граѓански организации), да достават краток опис за услугата за која имаат интерес (проект) и вид на социјална услуга, која е наведена во Јавниот повик.

–Рокот за доставување проекти е до 15 октомври 2019 година (вторник). Проектите се доставуваат по електронски пат, до Одделението за јавни дејности, по што Општина Берово ќе ги разгледа доставените проекти и ќе организира консултативни средби со сите граѓански организации кои пројавиле интерес, односно, доставиле проект за одредена социјална услуга на територија на Берово, додава Марковска.

Грантовите ќе бидат финансирани од МТСП и ќе бидат насочени кон развој на услуги што ќе ги обезбедуваат општините или во соработка со други даватели на услуги. Средствата од грантот ќе бидат наменети за воспоставување на услугата и финансирање на услугата по корисник по утврдена цена на услугата во наредните 12 месеци.