Во Берово одбележан Денот на независноста

Со пригодна свеченост денеска пред спомен костурницата на паднатите борци во Берово се одбележува 8 Септември, Денот на независноста. По тој повод, делегации од општествениот и политичкиот живот положија цвеќе пред спомен обележјето, а беше прочитан и реферат за значењето на овој датум за македонската историја.

– Денеска се одбележуваат 28 години од успешно спроведениот референдум, на кој македонските граѓани се изјаснија за самостојна и суверена држава. Денешниот празник ја отсликува пожртвуваноста на генерациите кои живееја со мислата за слободна и независна држава и не потсетува на предизвиците кој сме ги надминале, со надеж, со силна мудрост и верба да продолжиме понатаму, низ новото време и успешно да се справиме со новите предизвици, беше истакнато во говорот пред присутните.

Покрај Денот на независноста, претходно во Пехчево се одбележаа и 75 години од Ослободувањето на градот и 23 години од создавањето на Општина Пехчево како посебна административна целина. Во рамки на свеченостите беше положено свежо цвеќе пред споменикот на борецот од НОБ од Пехчево, Ванчо Китанов. Пред споменикот се поклонија делегација од Општина Пехчево, претставници на институции, на политички партии, здруженија на граѓани.

На свечената седница на Советот по повод значајните датуми беа доделени благодарници и признанија на граѓани и институции кои дале посебен придонес за развојот на Општина Пехчево.