Висок американски и руски генерал разговараа по телефон поради тензиите

Највисокиот американски воен офицер, генералот на воздухопловните сили Чарлс Квинтон Браун, минатата недела телефонски разговарал со началникот на рускиот Генералштаб, Валериј Герасимов, соопшти синоќа американската војска.

Тоа е првпат Браун да разговара со својот руски колега, јавија американски медиуми.

„Лидерите разговараа за голем број глобални и регионални безбедносни прашања, вклучувајќи го и тековниот конфликт во Украина“, наведе портпаролот на Браун во изјавата.

Реткиот повик се случи на 27 ноември, но „на барање на генералот Герасимов, генералот Браун се согласи да не го објави проактивно повикот“.

Барањето за повикот беше упатено од руското Министерство за одбрана, рече портпаролот.

Браун стана главен американски генерал лани, а Герасимов последен пат разговараше со претходникот на Браун, Марк Мили.