Уште една синагога во Сиднеј прошарана со антисемитски и нацистички симболи

Синагога во Сиднеј е исшарана со антисемитски графити, соопшти денеска градската полиција, еден ден по антисемитскиот вандализам во друга синагога во главниот град на Нов Јужен Велс.

Австралија во изминатата година забележа серија антисемитски инциденти, вклучувајќи графити на згради и автомобили во Сиднеј, како и подметнат пожар во синагога во Мелбурн, што полицијата го опиша како тероризам.

Во последниот инцидент, полицијата соопшти дека била известена за графити на синагогата, лоцирана во предградието Њутаун.

Куќа во источниот дел на Сиднеј, центар на еврејската заедница во градот, исто така беше исшарана со антисемитски графити, соопшти полицијата, додавајќи дека тие исто така ги истражуваат навредливите коментари на уличен плакат во предградието Мариквил.

Вчера била формирана специјална полициска единица која ќе го истражи нападот на синагогата во јужниот дел на Сиднеј, во предградието Алавах, вчера во раните утрински часови.

- Нема место во Австралија, во нашата толерантна мултикултурна заедница, за овој вид криминални активности, рече вчера австралискиот премиер Ентони Албанесе, мислејќи на инцидентот во синагога во јужен Сиднеј.

Австралија бележи зголемување на антисемитските и исламофобични инциденти откако Хамас го нападна Израел во октомври 2023 година и Израел ја започна својата војна против Газа.