Урсула фон дер Лајен при посетата на Белград: Ставот на ЕУ подразбира слобода, а не репресија

Претседателката на Европската комисија, Урсула фон дер Лајен која денеска е во посета на Србија изјави дека ставот на Европската унија „подразбира слобода, а не репресија, вклучително и правото на мирно собирање,“.

На прес конференција со српскиот претседател Александар Вуќич таа додаде дека Унијата се залага за партнерство, „а, не за потчинување и за дипломатија наместо агресија“.

Таа потсети дека пред речиси две децении, Србија го направила изборот да се приклучи кон ЕУ и очекува Белград да го забрза својот пат кон ЕУ и дека сега е вистинскиот момент Србија да преземе конкретни програми за приклучување.

„Првата поента е дека треба да видиме напредок во областа на владеењето на правото, електронските медиуми и изборните закони. Тие бараат упорност, трпение… Вреди да се вложи труд бидејќи ве доближува до целта, а тоа се темелите за одржливо и мирно општество. Сакам да го поздравам напредокот во врска со избирачките списоци и советот на РЕМ. Свесна сум за напорите што ги вложуваат сите за заедничка соработка, тоа е добар прв чекор. Имплементацијата е клучна. Затоа би ве поканил да дојдете во Брисел за еден месец за да видите каква е ситуацијата“.

„Морам да ве пофалам за усогласувањето на надворешната политика со ЕУ за 61 процент. Како дел од планот за раст, формиравте надзорен одбор. Мислам дека тоа е одличен сигнал“.

Српскиот претседател Александар Вучиќ изјави по средбата со фон дер Лајен дека членството во Европската унија е стратешка определба и сопственост на српската надворешна политика.

„Тоа сигурно нема да се промени до следните избори, а верувам дека дури и после тоа“, истакна Вучиќ.

Тој потсети дека од тогаш почетокот на војната во Украина, Србија не отвори никакво поглавје од преговорите со ЕУ, ниту кластер, иако, според него, некои работи се добро направени.

„Ми се чини дека барем направивме некои работи во последно време. Сè уште треба да направиме многу, но исто така треба да разговараме за насоката на нашата политика овде во земјата. Според тоа, верувам дека она што е направено во врска со регулаторната агенција, избирачките списоци и некои други работи поврзани со клучните енергетски прашања ќе добие позитивна оценка од Европската комисија“, рече Вучиќ.

Според него, изјавите дека Србија ќе влезе во ЕУ до 2025 година беа дадени во периодот кога некои други луѓе беа на чело на ЕК, но се покажа дека никој не го мислеше тоа сериозно и дека самата Србија не беше подготвена.

„Ќе се обидеме да го исполниме она што се нарекува реформска агенда и се надевам дека ќе ја имаме поддршката од Европската Унија за сето ова и дека ќе нè слушнат во Брисел. Не е секогаш едноставно и не е лесно целосно да им се презентира на луѓето овде“, рече тој.

Претседателот истакна дека постојат две клучни прашања за Србија, без да прецизира што точно мисли и да напомени дека оваа тема не мора да се отвори денес.

„Знаете кои се двете клучни прашања за нас. Не мора да ја отвориме таа тема денес, но ќе мора да ја отвориме меѓу нас во наредните месеци“, рече тој.

Вучиќ денес изјави дека за Србија членството во ЕУ е стратешка определба и приоритет на надворешната политика и дека тоа нема да се промени до следните избори, но дека верува и потоа, и наведе дека доставил писмо до претседателката на ЕК во кое бара од ЕУ да ја ослободи Србија од царините за челик.

МИА