УХМР сумираше, овој јуни руши рекорди еве зошто

До пет степени повисоки температури се измерени во јуни 2017 за разлика од истиот месец претходните години, соопшти УХМР.

Особено високи температури се регистрирани кон крајот на месецот. На 30 јуни се измерени екстремни вредности блиску до највисоките досега измерени за овој месец, додека средните минимални и средните максимални температури на воздухот се над просечните вредности.

Согласно месечната информација што ја изготви УХМР, средните месечни температури за јуни се движеа од 16,5 степени во Лазарополе до 25,6 во Гевгелија, 17,5 во Маврово, 18,2 во Берово, 19,5 во Крива Паланка, 20,9 во Охрид, 21,5 во Прилеп, 21,8 во Битола, 23 во Скопје, 23,6 во Струмица и Штип и 24,8 во Демир Капија. 

Највисоките температури, пак, се измерени во југоисточниот дел: Демир Капија 42,3 степени и Гевгелија 42, а во Штип 39,5, во Струмица 39,2, во Скопје – Зајчев Рид 38,8, во Битола 38,2, во Прилеп 37,7, во Охрид 35,3, во Крива Паланка 34,2, во Берово 33,8, во Лазарополе 30,7 и во Маврово 30,3 степени.

Во однос на врнежите, најголема месечна количина е измерена во Гевгелија и Крива Паланка, 101 и 75 милиметри. Во Берово наврнале 71 милиметар, во Струмица 57, во Лазарополе 56, во Скопје 48, во Штип 47, во Прилеп 44, во Демир Капија 36, во Маврово 32, во Битола 27 и во Охрид три милиметри.

- Главна одлика на врнежите во јуни е нивниот изразен локален карактер. На одредени места месечната сума е два пати поголема од просечната (Гевгелија), а на некои (Охрид) изврнале само еден процент од просечните месечни суми. На поголем дел од останатите мерни места, сумата на врнежите е блиска до просечната вредност, наведува Управата.

Висока дневна сума врнежи е измерена на 4 јули, во Гевгелија 71 милиметар, а дневни врнежи поголеми од 20 се измерени во Струмица (22 милиметри на 9 јуни), Лазарополе (22 на 7 јули) и Маврово (20 милиметри на 27 јуни).

Во деновите со значителни вредности на врнежите на многу места во Македонија било забележано нестабилно и олујно време со засилен ветер, грмежи и локална појава на град. Град со силен интензитет е регистриран на 14 јуни во Скопје, а на 7 јуни во југозападниот дел на земјата.