Убиен лидерот на огранокот на ИД во Авганистан и Пакистан

Лидерот на огранокот на екстремистичката група Исламска држава во Авганистан и Пакистан, Хафез Саид Хан е убиен  во американски воздушен напад, изјави претставник на американското Министерство за одбрана.

Авганистанскиот амбасадор во Пакистан вчера, исто така, потврди дека Хан, заедно со своите команданти и војници, биле убиени од американско беспилотно летало во авганистанската област Кот, во провинцијата Нангархар.

Портпарол на воената коалиција, која е предводена од САД во Кабул, не можел да ги потврди извештаите, но истакнал дека се спроведува истрага.

Смртта на Хафез Саид Хан е тежок удар за џихадистичката група, која се обидува засекогаш да се „закотви“ во Пакистан и Авганистан.