Уапсени над 200 наставници во Иран

Повеќе од 200 ирански наставници се уапсени во текот на протестот пред зградата на Парламентот во Техеран, во кој побараа од затвор да бидат ослободени нивни колеги и политички активисти.

Пред Парламентот вчера се собраа најмалку 2.000 наставници од разни делови на Иран, носејќи транспаренти и извикувајќи „Ослободете ги уапсените“, соопшти Националниот совет на отпорот во Иран (НЦРИ), што претставува иранска група активисти со седиште во Париз.

Според наводите на активистите, уапсени се 200 наставници, а демонстрантите ги растерала полицијата.

Наставниците побараа од затвор да се ослободат политички активисти, меѓу кои е и Есмаел Абди, претседател на синдикатот на просветни работници, кој се уапсени бидејќи „ ги бранел правата наставниците“, наведоа активистите во своето соопштение, пренесено од француските медиуми.

НЦРИ претставува коалиција на ирански опозициски групи, меѓу кои е и Народната муџахединска организација на Иран, која САД и ЕУ ја сметаат за терористичка организација.

Иранските власти, освен апсењата, засега вербално не се огласија за протестот и изјавите на наставниците.