Турција не им дозволи на германски пратеници посета на Инџирлик

Турција не им дозволила на неколку германски пратеници да ги посетат војниците на Вооружените сили на Германија, кои се стационирани во турската воздухопловна база Инџирлик, јави ДПА.

Во базата Инџирлик се распоредени околу 250 германски војници. Бундеверот оттаму извршува летови на разузнавачки авиони во рамки на операцијата на коалицијата во борбата против Исламска држава. 

Како што јави германскиот весник „Фокус“, по ваквата информација дека Анкара ги спречила германските пратеници да ги посетат германските војници, претседателот на Комисијата за одбрана на Бундестагот, Волфганг Хелмих изјави дека е неопходно припадниците на Бундеверот да бидат повлечени од Турција,

- Нема да дозволиме да не уценуваат. Затоа правилната одлука ќе биде да почне разгледување на повлекувањето на војниците и нивно распоредување на друго место, изјави Хелмих. 

Турските власти ја воведоа забраната за посета на Инџирлик од страна на германски пратеници, откако минатата година Бундестагот усвои резолуција за осуда на ерменскиот геноцид.