Тројца полицајци пренесени на Клинички по тешка сообраќајка во Скопје

Тројца полициски службеници се повредени во сообраќајна несреќа што вчера околу 13:00 часот се случила на булеварот „Крсте Мисирков“ во Скопје.

Според информациите од МВР, во несреќата учествувале автомобил „МГ“ со скопски регистарски ознаки, управуван од 29-годишниот М.М. од Кичево, и „шкода“, сопственост на МВР, управувана од 31-годишниот Н.Ѓ. од Скопје.

Во судирот со телесни повреди се здобиле возачот на службеното возило и неговите сопатници Т.Џ.(35) од Батинци и П.Т.(35) од Скопје, сите полициски службеници.

Повредите им биле констатирани во Ургентниот центар при Комплексот клиники „Мајка Тереза“ во Скопје.

Увид на местото на несреќата извршила екипа на СВР Скопје.