Трговската размена меѓу САД и Кина во трите тромесечја се намалила за 14,8 отсто

Главната царинска служба на Кинеската Народна Република објави синоќа податоци за трговијата со САД според кои трговската размена меѓу двете земји од почетокот на годинава заклучно со крајот на септември се намалила за 14,8 отсто, до вредност од 402,66 милијарди долари.

Испораките на кинески стоки и услуги во САД за посочениот период во 2019 година се намалиле за 10,7 отсто, до 312 милијарди долари. Количеството увезена стока од САД, пак, се намалило многу повеќе, за 26,4 отсто, достигнувајќи 90,66 милијарди долари.

Официјален претствник на кинеската царинска служба истакна дека за време на последните трговски преговори кои минатата недела се одржаа во Вашингтон, бил постигнат прогрес.

– На повторната рунда кинеско-американски трговско-економски преговори успеавме да постигниме реален прогрес во некои правци, изјави претставникот.