Трамп: Украина и Русија се согласија да не напаѓаат енергетски објекти

Претседателот на САД, Доналд Трамп на платформата „Трут соушл“ објави дека Украина и Русија се договориле да не напаѓаат енергетски инфраструктури.

– Украина се согласи да не напаѓа руски енергетски објекти. Русија се согласи да го направи истото! Зголемувањето на цените на дизелот низ целиот свет во голема мера се должи на војната меѓу Русија и Украина, а не на Иран, наведе Трамп.

Тој вчера од Ирска побара од украинскиот колега Володимир Зеленски да престанат нападите врз руската дизел инфраструктура.

– Господинот Зеленски мора да направи едно нешто. Мора да престане да го уништува производството на дизел во Русија бидејќи тоа предизвикува недостиг на дизел, наведе вчера Трамп.

Изминатите месеци украинските напади со беспилотни летала со долг дострел врз руските рафинерии го намалија производството на гориво во Русија, предизвикувајќи недостиг на бензин низ целата земја. Москва поради тоа забрани извоз на дизел. Русија е втора најголема извозничка на дизел, веднаш зад САД.

Претходно, портпаролот на Кремљ, Дмитриј Песков го поздрави вчерашниот апел на американскиот претседател Доналд Трамп, кој побара Украина да ги прекине нападите врз руската дизел инфраструктура, што предизвикуваат недостиг на гориво.

– Можам само да ги поздравам сите повици до режимот во Киев да ги прекине нападите врз глобалната економска инфраструктура, наведе Песков.

Тој посочи дека ситуацијата на глобалните енергетски пазари се влошува главно поради „нестабилност и нова ескалација во регионот на Персискиот Залив“, а евентуалната забрана за извоз на дизел би можела да даде нов импулс на домашниот руски пазар.

Според Киев, нападите врз руските рафинерии имаат за цел да ја зголемат цената што Москва ја плаќа за продолжување на војната во Украина.

Русија исто така ја интензивираше воздушна кампања против Украина изминатите недели, користејќи балистички ракети и дронови со млазни мотори. Нападите на Москва се насочени и кон украинската електроенергетска мрежа пред зимата, што според претставници на украинските власти има за цел да го деморализира цивилното население.

Цените на нафтата на светските берзи се искачија над 108 долари за барел поради војната на Блискиот Исток. Снабдувањето е дополнително ограничено поради застојот во Ормуска Теснина. Во меѓувреме, гасоводот Исток-Запад на Саудиска Арабија, главна алтернативна рута на Ријад за извоз на сурова нафта преку Црвеното Море, беше затворен на 11 септември поради нападите со дронови извршени од Ирак, што дополнително ја комплицираа ситуацијата.