Трамп ја запира имиграцијата од 19 неевропски земји

Американскиот претседател, Доналд Трамп, даде низа исклучително остри коментари за Сомалија и сомалиските мигранти, бидејќи неговата администрација објави дека ги паузира сите апликации за имиграција од 19 неевропски земји, повикувајќи се на националната и јавната безбедност.

Трамп зборуваше на состанок на администрацијата за случај во сојузната држава Минесота, каде што, според локалното правосудство, повеќе од милијарда долари биле исплатени на непостоечки социјални служби преку лажни сметки поврзани со Сомалијци.

Истиот ден, администрацијата на Трамп објави дека ги паузира сите апликации за имиграција, вклучително и обработка на зелени карти и апликации за државјанство, од 19 неевропски земји кои веќе беа под делумни ограничувања во јуни. Листата ги вклучува Авганистан, Бурма, Чад, Конго, Еритреја, Хаити, Иран, Либија, Сомалија, Судан, Јемен, Венецуела, Бурунди, Куба, Лаос, Сиера Леоне, Того, Туркменистан и Венецуела.

Во официјалниот меморандум се наведува на неодамнешниот напад врз припадници на Националната гарда во Вашингтон, во кој еден гардист беше убиен, а друг беше сериозно ранет. Осомничен за нападот и уапсен е еден Авганистанец. Меморандумот повикува на „темелно преиспитување“ на сите барања, вклучително и можни интервјуа или повторни интервјуа на кандидатите.

Откако се врати во Белата куќа во јануари, Трамп даде приоритет на построго спроведување на имиграциските закони, испраќање федерални агенти во големите градови и засилување на депортациите. Минатата недела тој објави дека сака „трајно да ја суспендира имиграцијата од сите земји од третиот свет“.

МИА