Трајановски: Во Аеродром ќе се гради ново средно училиште

Изградбата на новo средно училиште на територијата на општина Аеродром е еден од приоритетите на ВМРО-ДПМНЕ и коалицијата „За подобра Македонија“ за наредните 4 години.

Деталите за овој капитален проект денеска на прес-конференција ги соопштиja кандидатите за градоначалници на Град Скопје и општина Аеродром од ВМРО-ДПМНЕ и коалицијата „За подобра Македонија“, Коце Трајановски и Ивица Коневски.

- Аеродром е општината со најголем развој во Скопје изминативе неколку години, преку изградбата на неколку нови населби, пред се во околината на Ново Лисиче, како и урбанизацијата долж булеварот „Трета Македонска бригада“ и населбата Стар Аеродром. Ова е и многу „млада“ општина, ако се земе во предвид структурата на населението кое живее тука. Порастот на популацијата во Аеродром го наметна и барањето за изградба на ново средно училиште со гимназиска насока на територијата на оваа општина. Овој проект ќе се реализира во директна соработка со Општина Аеродром и Владата на Република Македонија, а изградбата на истото ќе чини околу 120 милиони денари. Со изградбата на ново средно училиште во Аеродром ќе се подобри достапноста на учениците до училиштата и ќе се унапредат условите во кои учат учениците, а со тоа и квалитетот на воспитно-образовниот процес – кажа Трајановски.

Покрај реализацијата на овој капитален проект, во областа на образованието предвидени се голем број на проекти, каде како најважни можат да се издвојат инвестициите во реконструкции на сите средни училишта, подобрување на условите за физичката настава преку изградба и реконструкции на спортските сали во средните училишта, продолжување на поддршката на талентираните и надарени ученици, како и изградба на нов објект на средното училиште „Кочо Рацин“.