Таравари: Со Гаши се договоривме но со Касами тешко оди договорот за голема опозициска коалиција против ДУИ

Се уште траат преговорите во албанскиот опозициски блок за формирање на коалиција на трите најголеми партии, Алијансата на Села, Беса на Касами и Алтернатива на Гаши. 

Генералниот секретар на Алијансата за Албанците, Арбен Таравари, утрово во изјава за медиумите вели дека работата со Алтернатива на Гаши е речиси завршена, но со БЕСА се уште постојат разлики. 

„БЕСА декларативно вели дека е за соработка, од друга страна, по нивните постапки, како постапуваат на терен и што објавуваат на нивните партиски блогови, тотално е спротивно. Значи декларативно кажуваат дека се за соработка од друга страна нивните напади се поостри кон Алијансата и кон Алтернатива отколку кон ДУИ“ – вели Таравари за Слободен Печат.

Евентуален заеднички настап на опозицијата во албанскиот политички блок ќе биде сериозна закана за ДУИ, партија која непрекинато е на власт повеќе од 10 години. Последните анализи на јавното мислење покажуваат дека Алијансата, Алтернатива и БЕСА заедно имаат идентичен рејтинг како и интегративците од Мала Речица.

Александар Спасовски