Тактичка вежба на АРМ на полигонот Криволак

Армијата на Република Македонија со изведба на тактичка вежба со боево гаѓање „Засилен механизиран пешадиски баталјон во напад“ што се одржа денеска на армискиот полигон Криволак, го прикажа нивото на обученост и извежбаност на своите припадници во извршување на офанзивни операции на поголеми здружени состави од повеќе нејзини единици.

 

- Приказот на мерките и процедурите во извршување на борбените постапки во сложени услови на воиштето, со употреба на голема огнена моќ ја претстави подготвеноста на АРМ за исполнување на уставната мисија за заштита на територијалниот интегритет и суверенитет, но и за сите предизвици кои се очекуваат од НАТО предводените операции, се вели во соопштението од Армијата на Република Македонија.

 

На вежбата присуствувал и претседателот на Република Македонија и Врховен командант на Армијата, Ѓорге Иванов, кој во обраќањето пред припадниците на АРМ оддал признание за професионалното однесување, високата мотивираност, покажаните вештини и обученост не само за беспрекорно изведената вежба, туку и за сите ангажирања на припадниците на АРМ во справувањето со елементарните непогоди.