СВР-Битола со претпразнични препораки и предупредувања

Секторот за внатрешни работи-Битола во пресрет на претстојниот празник Илинден јавно препорача и предупредува за безбедно одвивање на сообраќајот, да се почитуваат сообраќајните знаци, прописи и наредби на полициските службеници.

Од СВР-Битола нагласуваат дека секогаш, а и за време на празникот, не е дозволено управување на возила под дејство на алкохол и наркотични средства, без возачка дозвола и технички неисправни возила.

– Поради големиот број на прослави, собири и манифестации на подрачјето на СВР-Битола, каде ќе има масовно собирање на граѓани, апелираме до сите граѓани да не го нарушуваат јавниот ред и мир. Забрането е  неовластено пукање и употреба на оружје и пиротехнички средства, учествување, предизвикување или поттикнување друг на тепачка, оддавање на пијанство на јавно место или нарушување на јавниот ред и мир во пијана состојба, посочуваат од СВР-Битола и додаваат дека граѓаните треба да го заштитат својот имот, односно додека се движат во места каде има повеќе народ да внимаваат на својот паричник, мобилен телефон и други вредни предмети.

Од СВР-Битола во јавното соопштение посочуваат на внимателно користење на социјалните мрежи како и објавувањето на слики и места каде граѓаните се во моментот, со што им се укажува на останатите дека не се дома а со тоа стануваат лесен плен за кражба.