Светски ден на предвремено породување

Информации за предвременото породување и за предизвиците со кои се соочуваат предвремено родените бебиња и нивните семејства ќе понудат денеска на штанд во Скопје сити мол клубот на родители „ПремНова“ и Здружението „Лулка“ по повод 17 ноември - Светскиот ден на предвременото породување.

Овој ден го одбележуваат, пред се, родителите преку голем број национални родителски организации во речиси сите држави во светот, но и здравствените работници на одделите кои работат со предвремено родените бебиња и целата јавност.

Според податоците на „Лулка“ 10 до 15 проценти од сите новородени се раѓаат предвреме.  Значајно е тоа што речиси 50 проценти од сите предвремени породувања настануваат од непознати причини, но има и бројни познати ризик-фактори кои треба да ги знаеме за да го превенираме или предвидиме предвременото породување. Предвременото породување може да му се случи секому, а она што следи потоа е исклучително тежок период за предвремено роденото бебе и за неговото семејство, соопштуваат од здружението.