Стружани ја продолжија традицијата за празнувањто на Бадник

Со пеење на икондатот на раѓањето Христово „Дјева Дњес“ на црковно старословенски јазик и импровизираната пештера која го симболизира раѓањето на Исус Христос, стружани во повеќе групи од ноќеска на полноќ ги посетуваат семејствата со што почна празнувањето на најголемиот христијански празник, Раѓањето Христово - Божиќ.

Перо Гогоски еден од членовите во групата информира дека ова е стара струшка традиција, која е возобновена последните четири години со која почнува славењето на Бадник и раѓањето Христово.

- Се оди по домовите, се пее Дјева, се носи пештерата во која е претставено раѓањето на богомладенецот. Според некои постари стружани традицијата има поврзаност со девојките и момчињата кои се за мажење и женење, вели Гогоски.

Неизоставен дел од струшката традиција е и коледарењето на најмладите кои ги посетија домовите внесоа радост и беа дарувани со овошје, оревчиња, пари...

Во црквите во Струга и струшко се одржа утрена претпразнична молитва во која се споменуваат сите евангелија поврзани со Христовото раѓање.