Столтенберг денеска на средби со Османи и Курти во Приштина, во вторник доаѓа во Скопје

Генералниот секретар на НАТО, Јенс Столтенберг денеска ќе го посети Косово, каде што ќе се сретне со претседателката на државата, Вјоса Османи и со премиерот Албин Курти.

Според официјалната програма, Столтенберг ќе го посети и кампот „Нотинг хил“, на Мировната мисија на НАТО – КФОР, каде што ќе се сретне со командантот генерал Озкан Улуташ и ќе им се обрати на војниците, а ќе се сретне и со директорот на Советодавниот и тим за врски на НАТО, бригадниот генерал Хамерштајн.

Пред доаѓањето на Косово, денеска генералниот секретар Столтенберг својата турнеја низ Западен Балкан ќе ја започне со посета на Босна и Херцеговина, каде што ќе се сретне со високиот претставник на меѓународната заедница во таа земја, Кристијан Шмит, како и со претседателката на Советот на министри на Босна и Херцеговина, Борјана Кристо.

Столтенберг ќе го посети и седиштето на НАТО во Сараево и ќе има средби со воени лидери и претставници на меѓународната заедница.

Генералниот секретар утре ќе престојува во Белград, каде ќе има средби со претседателот на Србија, Александар Вучиќ и со премиерката Ана Брнабиќ.

Подоцна, во текот на денот, Столтенберг ќе допатува во Република Северна Македонија, на средби со претседателот Стево Пендаровски и со премиерот Димитар Ковачевски. Генералниот секретар ќе се сретне и со претседателот на Собранието на Северна Македонија, Талат Џафери и ќе се обрати на Собранието.

Генералниот секретар на НАТО во среда ќе учествува на состанок со сојузничките лидери од регионот, што ќе се одржи во Тирана.