Стојаноска: Францускиот предлог ќе направи невиден геноцид врз македонскиот народ

Пратеничката на ВМРО-ДПМНЕ, Дафина Стојаноска од денешната седница на која втор ден се дискутира за владините заклучоци по однос на Францускиот предлог за спорот со Бугарија обраќајќи се до владините преставници, од кои присутен беше само вице премиерот за евро интеграции, Бојан Маричиќ рече дека тој нека го слушне нејзинот слово денеска од собраниската говорница и дека како во изминатите години така и денеска гласно ќе зборува за проблемите со кои се соочува Македонија и македонскиот народ.

„Гледам дека од бугарското трио во салава е само Маричиќ, па еве тој не го послуша моето слово денес. Мачно ми е на душава и не сакав до ова да дојде. Знам дека во политиката нема место за емоции, па ќе се обидам истите да ги тргнам настрана. Нема да се обраќам до поединечните етнички заедници во овој парламентарен состав. Одлучив да се обратам на три категории на пратеници кои не се однесуваат ниту на пратеничките групи, ниту на политичките партии, а ниту на етничка или верска припадност на поединците“, рече Стојаноска.

Обраќајќи се до колегите пратеници од минатиот и сегашен парламентарен состав и до сите кои што го поддржуваат предлогот на француското претседателство, истакна дека ако со одбележувањето на Охридскиот рамковен договор се потсетуваме на жртвите од војната во 2001 година, Францускиот предлог ќе направи нов и до сега невиден геноцид врз македонскиот народ.

„Моите колеги од минатиот и од сегашниот состав, а тоа е втората категорија на која денес сакам да им се обратам, исто така се надевам дека ги паметат моите говори за одбележувањето на Охридскиот рамковен договор. Едниот беше 2018, другиот 2020 година. И повоторно тогаш некои ми честитаа за храброста, а некои за лудоста јас да се осмелам да говорам за оваа тема. И да, Охридскиот договор и денес не потсетува за жртвите, и денес не предупредува да внимаваме за секој кажан збор, секој преземен чекор и секоја донесена одлука.

Ако Охридскиот договор остави многу жртви зад себе и за секоја измината година ни остава простор да се помириме со тоа  и да ги тагуваме нашите жртви, секој со својата болка и кауза, Францускиот предлог и сите кои сметаат дека е единствен, најдобар и последен ќе направи нов и до сега невиден геноцид врз македонскиот народ“, вели Стојаноска.

Зборувајќи за периодите во кои таа беше дел од последните два парламентарни состава и како поискусните колеги пратеници тврделе дека потежок период за Македонија немало, еве сега пак сме исправени пред еден од најтешките предизвици, пред предизвикот јазик, пред бришење на неговата вековна историја и употреба.

„И еве не денес, повторно исправени пред предизвикот јазик, исправени пред искривувањето на постоењето на македонскиот јазик, пред бришењето на неговата вековна историја и употреба, пред бришењето на идентитетот на оние чиј што мајчин јазик е македонскиот. А, ако јазикот му го одземете или негирате на секој човек, па и на Македонецот, тогаш го правите нем и невидлив, го бришете од картата на постоењето и опстојувањето“, истакна пратеничката Стојаноска.