Стоилковиќ кон Костовски: Ве напумпавме на избори, да не сакате и некое друго пумпање?

Организацискиот секретар на Социјалдемократскиот сојуз на Македонија (СДСМ), Мартин Костовски, на својот Фејсбук-профил објави порака „Пумпај“, слоган што секојдневно се користи на студентските протести во Србија. Со тоа, Костовски им изрази поддршка на студентите пред денешните големи протести во Белград.

Зборот „пумпај“ одекнуваше на сите досегашни протести во Србија. Со тоа, стана вирален лајтмотив.

По објавата на секретарот на СДСМ, вицепремиерот и министер за односи меѓу заедниците Иван Стоилковиќ, направи принтскрин од статусот на Костовски и го сподели на неговиот приватен фејсбук-профил со коментар: Напумпамо ве на избори. Да не сакате и неко друго пумпање? Затвори чекав …, пишува Стоилковиќ.

СДСМ преку писмено соопштение најостро ги осуди ваквите , како што велат, „шокантните навреди од вицепремиерот на Мицкоски, Иван Стоилковиќ кон организациоскиот секретар на СДСМ, Мартин Костовоски на Фејсбук“.

-Пораката кон Мартин Костовски од страна на Стоилковиќ и прашање дали сакал да го „напумпа“, е скандал и демонстрација на врвен простотилук од страна на високиот владин функционер.  Ова ниско ниво на комуникација и закани на вицепремиерот е доказ за безобразието и злобата на претставниците на власта која се демонстрира кон опозцијата. СДСМ бара итно оставка од Стоилковиќ по овој скандал, доколку самиот не се повлече Мицкоски мора веднаш да го разреши. Го прашуваме Мицкоски дали тој се согласува со ваквата изјава на Стоилковиќ и дали ја оправдува? Дали ова е новото нормално во комуникацијата на владините функционери и дали овие закани и навреди стануваат секојдневна пракса? Срамно, ниско и недозволиво. СДСМ му дава целосна поддршка на Костовски, за оваа навреда и закана ќе поднесеме претставки до институциите, стои во реакцијата на СДСМ.

Во Белград денеска се одржува масовен протест на студенти и граѓани од целата држава, што се смета за кулминација на три и пол месечните демонстрации на кои се бара одговорност за загинувањето на 15 лица при уривањето на натстрешницата на Железничката станица во Нови Сад и поправедно и подобро општество без корупција и без политички притисок и влијание на институциите.