Стефановиќ: Во Србија онолку мигранти колку што ќе можат да влезат во Австрија

И Србија и Унгарија ќе следат што се случува во Европската унија и согласно тоа ќе се однесуваат во мигрантската криза, беше порачано од денешниот состанок на министрите за внатрешни работи на Србија и Унгарија Небојша Стефановиќ и Шандор Пинтера.

Од средбата во Хоргош најавено е дека во Србија ќе можат да влезат онолку бегалци колку што ќе можат да влезат во Австрија.

Обајцата министри порачаа дека Србија и Унгарија ќе работат во интерес на своите граѓани со цел спречување на ескалација на кризата, јавува РТС.

На прес-конференцијата по средбата соопштено е дека нема да се дозволи ниту Србија, ниту Унгарија да бидат местата каде ќе се задржуваат мигрантите.

Согласно тоа, економските мигранти во иднина нема да можат да заминуваат по оваа рута во Европската унија.

Стефановиќ најави дека ќе биде формирана работна група која зајакнато ќе биде ангажирана на македонско-грчката граница, со цел подобро решение на проблемите на балканскиот пат на мигрантите.