Српските опозициски пратеници со критика за Владата и претседателот Вучиќ за настаните со Македонија

 Опозициските пратеници во српскиот Парламент денеска ги критикуваа претседателот Александар Вучиќ и српската Влада во врска со настаните поврзани со Македонија, и оценија дека тоа што се случи е невообичаена дипломатска пракса, јавија спрските медиуми.

-Би било добро компетентните служби да ни кажат за што станува збор, а не да нагаѓаме, пред новинарите во Парламентот изјави Санда Рашковиќ Ивиќ, член на парламентарната група „Нова Србија - Движење за спас на Србија“.

Таа додаде дека се што се случи ја покажува политичката незрелост на првите луѓе од власта.  

Независниот пратеник Јован Јовановиќ, кој е поранешен амбасадор, оцени дека во конкретниот случај станува збор за невообичаена дипломатска пракса.

Тоа што се случи меѓу Србија и Македонија тој го спореди со ситуацијата со „нашараниот воз“ што тргна кон Косово, а потоа беше вратен назад.

Според него, станува збор за непотребно создавање тезнии, што е во спротивност со дипломатската пракса.

Србија во неделата вечерта во целост го повлече својот дипломатски персонал од амбасадата во Скопје, без да ги посочи причините за тоа.