Сретен Давидов од Неготино ја прими Водовниковата награда во Словенија

Триесетгодишниот доктор на науки Сретен Давидов кој е по потекло од Неготино, вчера прими Водовникова награда од Факултетот за електротехника при Универзитетот во Љубљана. Наградата  му беше доделена за неговиот докторат од областа на подрачјето на електромобилноста, на свечената приредба по повод сто години од основањето на универзитетот.

-Останувам со истата посветеност во работата, затоа што одговорноста да се соочиме со сите идни проблеми во електротехниката, значи и да ги надминеме сите предизвици, изјави Давидов за МИА.

Тоа е всушност признание за квалитетот на докторатот, неговата препознатливост и убедливост за ова подрачје, појасни тој.

-Работата мора да значи и складно размислување, комплементарно донесување на заклучоци и согледување на потенцијалот во примерите  на анализа. Деталите и прецизноста секогаш го даваат конечниот резултат, достигнување на целта, нагласи тој.

Младиот неготинец докторираше на 28 години. Во земјава беше добитник на наградата за најдобар млад научник за 2017 година. Во моментов работи во Службата за технолошки развој на Електро Љубљана, словенечката Електродистрибуција.