Србија го враќа амбасадорот од Полска поради писмо на подршка на ЛГБТ зедницата

Амбасадорот на Србија во Полска, Никола Зуровац, сменет е денес на седницата на Владата на Србија, јави дописникот на МИА од Белград.

Неговото разрешување денес го најави министерот за надворешни работи Никола Селаковиќ, бидејќи амбасадорот во Варшава, Зуровац, потпишал писмо за поддршка на полската ЛГБТ заедница со уште 40 амбасадори без да се консултира со Белград.

Како што соопштија српските медиуми, Зуровац писмото го потпишал ден пред посетата на Никола Селаковиќ на Полска, што наишло на негативна реакција од тамошните конзервативни власти, поради што наводно била откажана посетата на шефот на српската дипломатија.

Никола Селаковиќ изјави денеска дека причината за отповикувањето на српскиот амбасадор во Полска не била во содржината на писмото што го потпишал, туку во тоа што тој не го известил министерот за постапката, кому му одговара за неговата работа.

-Амбасадорот нема никого известено за тоа. Не зборуваме за темата на писмото и неговата содржина. За да се избегнат сите инсинуации, не станува збор за содржината на писмото, туку за пропуст на српскиот амбасадор да пристапи кон нешто за што не го известува оној кому му одговара за својата работа, изјави Селаковиќ и додаде дека што и да Зуровац има потпишано без да праша, може да наруши некои односи и тоа е проблемот, изјави Селаковиќ.

Од друга страна, поранешниот српски амбасадор во Белорусија и експерт за меѓународни односи и надворешна политика Сречко Ѓукиќ изјави за Нова.рс дека одлуката на Селаковиќ итно да го повлече амбасадорот Никола Зуровац од Варшава, само затоа што има потпишано писмо за поддршка на полската ЛГБТ заедница, е додворување на полската клерикална влада.